இன்னாசி முத்தான்.

காடு பார்த்தல் கூரை வேய்தல்
ஆடு மேய்த்தல் கூடை முடைதல்
சீவனம் .

ஏர்பூட்டினால்  கோவணம்
நீர்பாய்ச்சினால் அரை டிராயர்
எப்போதாவது பழுப்புக் கைலி.

செய்யது பீடி காதில் இருக்கும்
சாராயப் பழக்கமுண்டு.

தண்டுவன்
தாசி போனதில்லை.

சின்னக்கொட்டகை தரை டிக்கெட்
தின்னக் கொஞ்சம் சோளப்பொறி
பொழுதுபோக்கு.

விறகொடித்துக் கொடுப்பன்
தண்ணீர் தெளித்து எரிப்பர்
ஊரில் சில பத்தினிகள்.

காப்பித் தண்ணி, டீத்தண்ணி
சாராயம் குடிக்க வெளியே ஒடுங்கி
உள்ளே நசுங்கிய
அலுமினிய டம்ளர்
அவனைப்போலவே

வாசற்கோலங்கள்
வீட்டுக்குள் போவதில்லை.